Unser gebet zuvor, liben herrn und frunth! Als ir uns verschriben habt, und des herrn von Swambergk brief gesant habt, der do schreibt, wie wir im schuldig sullen sein von schuczung wegen. Nu ist uns und den unsern gar umbissend darumb und ir schuld unser wol mechtig sein zu einem tag an gelegen stet gein Eger, wenn uns nicht fuglich ist vor den hussen fur dem pehemer walt zu tegen zu reitten, als ir das selbs wol verstet, und wir im ungern teg aussgin wolden. Darumb so gelaub wir euch wol, und bitten euch, das ir im schreiben wold umb ain frid auf ein zeit, und in derselben czeit ein fruntlichen tag gein Eger und auf demselben tag wirt man wol horen sein zuspruch und unser antwurt, und wollen Im und den sein do gern als vil sein nach pider leut derkennthnuss als pillich und muglich ist, wenn uns und den unsern gar ungutlich geschicht von den sein, die uns rauben wider got und recht und uns die unsern gemort haben. Thut in den sachen, das wir umb euch und die ewern verdinen wollen, und wir dancken euch ewr mue. Ewer verschribene antwurt. Geben zu Valkenbergk des Suntags vor Bartholomei anno et cetera XXVIIII.