Ich Ditrich Alemsdorff iczund uff deme slosse zcu Brux an dinste meiner lieben genedigen herren von Sachßin, landgraven in Doringen und marcgraven zcu Missin bii irem amptmanne Brosiusse vom Hogenist doselbist bekenne und thu kund offintlichin mit diesem brive vor allen, dii in sehen adir horen lesen: nach deme und die selbigen meine genedigen hern dem gnanten Brosiusse vom Hogeniste ire slos und stad zcu Brux ingetan, geantwort und in amptmans wise an stad der selbin meiner genedigen hern zcu vorwesen enpfolen habin, alsdanne das ire und seine brive darübir gegebin eigintlich ußwisen, ab sichs fugete, das an dem genanten Brosiusse vom Hogenist ichte geschege, ab er abginge adir gefangin wurde, das got lange friste, das ich danne den obgnanten meinen genedigen herren, iren brudern und erben die obgeschriben slos und stad zcu Brux mit allin dingen, als das in irer beider brive gecleret ist, zcu gute haldin, unverczogelich antworten, ingebin und das nicht anders haldin sal und wil, danne als einem biderben, fromen manne wolfugit und zcugeboret gein seinem rechten, geboren, naturlichen hern und in allirmaße, als sich des der egnante Brosius auch vorschriben had. Und furspreche und gelobe das in craft dis brives den megenanten meinen genedigen herren, iren brudern und erben an eydes stad bei meinen gutin truwen und waren worthen, und dawider nicht zcu komen adir zcu thune mit worten adir werckin adir durch keinerleie sache willen, ane arg und alles geverde. Des zcu bekentnisse und merher sicherheit hab ich mein sigel mit rechter wissinschaft an diesen brief laßin hengin, der da gegebin ist nach Cristi geburd virczehenhundirt und darnach in den czweiundrisigisten jaren, an des heiligen cruczes tage, als es funden wardt.