Magistro civium et consulibus juratis majoris civitatis Pragensis. Ampliorem, spectabiles viri, redintegrandæ inter nos pacis spem vestris e scriptis concepimus; supplices proinde dominum rogantes, quatinus quod salubre in nobis utrimque pro sua laude et nostra adinvicem renovanda in sinceritate fidei et dilectionis unanimitate incepit ipse, qui vinculum est et osculum pacis, perficiat perfectumque insolubiliter firmet. Et ut flagranti, qui in nobis est hac parte, affectui qualicunque pro viribus effectu respondeamus, parati sumus, ut petitis, caritativum vestrum et finale, ut verbis vestris utamur, in destinatum diem non modo patienter, sed et gaudenter præstolari responsum; nihil dubitantes, quin et hoc Basiliensis sacro sancta synodus, digesto scriptorum vestrorum audito tenore, laudabit et probabit, vestramque excusationem tamquam rationabilem favorabiliter admittet et promissum responsum æquanimiter exspectabit. De procuranda vero literarum vestrarum bajulis ac nuntiis securitate circumspectis et providis viris consulatus Egrensis, tamquam viris reconciliationis et fidis hac parte mediatoribus, confidenter pro parte dicti sacri concilii scripsimus, supplicantes, quatinus hujusmodi singulares et simplices vestros ad nos dirigendos huc nuntios eo quo requisierint aut opus fuerit loco favorabiliter et pacifice recipiant et salvos ad nos usque perducant. Nobiscum autem, quamdiu commissa negotia flagitant, inoffensi manere poterunt, et licenciati deinde ad vos salvi, ut indubitanter speramus, redire. Si quid autem amplius hujusmodi portitorum assecuratio deposcat, apud dictos dominos de Egra requirant; et credimus, quod in hoc Vestræ Providentiæ ac vestris non deficient, etiam si onus in se literas vestras nobis præsentandi ipsi assumere deberent. Postquam autem insignes et celebriores ad dictum concilium aut nos mittere decreveritis oratores, tunc juxta consilium et auxilium principum et potentum, qui se ad hoc hactenus nobis parte memorati concilii requirentibus benivolos et obsequiosos obtulerunt, et amodo facto ut confidimus exhibebunt, taliter providere conabimur, ut secundum condicenda inter nos pacta et humanam conjecturam vos merito remanere debeatis hac parte contenti; hoc solum caritate non ficta nec subdola suasione commonentes, ut salutis acceptabile tempus fructuosis mutuo et expeditis tractatibus redimamus. Sicque nos ad alterutrum non fronte minaci vultuque torvo, sed pacatis et placidis animis exhibeamus, ut non in vanum nobis hoc sero, quod absit, plangamus delapsum. Datum xii die Februarii, anno etc. xxxii°. Fratres Johannes Nider etc. et Johannes de Mulenbrun, humiles nuntii sacri2

MC I, s. 180–181, č. 87: sacrii.