Wir bruder Herman, Abbt deß closterß Ebrach Ordtens von Citel im Bistumb Würtzburg gelegen, bekennen offentlich mit diesem brieff gen allermenniglichen, daß zue uns komen ist die ersame frau Eufemia witwe, die etwan ein eheliche gemahel des ehrsamen unndt weisen mans Adams, bürgers der grössten Statt zue Praag, gewesen ist, undt bracht für uns, wie ihr der ehrwürdtig Herr, Herr Arnoldt seeliger gedechtnüs, etwan Abbt undt das Conuent gemeiniglich des Klosters zue Nepomunk auch Ordtens von Cital in Prager Bistumb gelegen, schuldtig weren hundert trithalb unndt zweintzig schockg groshen behemisher muntz, unndt weiset uns des mit einem guten etlichen shultbrieff mit des vorgenanten Herrn Arnoldts, zue den Zeiten Abbts, undt des Conuents insiegel versiegelt, der das clärlich inhelt unndt ausweiset, das dieselben shuldten sie Ihr bezalt undt ausgericht solten haben auff S. Jörgen tag, der da vergangen unndt gewesen ist, als man zalt nach Christi Unsers Geburts vierzehenhundert undt zwaintzig iahr, als das der vorgemelt Ihr schultbrieff mit mehr worten auch inhelt etc., und hat auch dieselbe Ersame frau dabey zuewissen gethan, wie Ihr der vorgenant Abbt undt das Conuent zue den Zeiten, als sie von den Missglaübigen bekennen, beshedigt undt etlicher masß verderbt wurdten, an der vorgenante Ihre shulte Pfandtweise eingeben undt empfohlen hatten, nemblich vier silberne Kelch mit sambt treyen Pathen, dieselbe Kelch undt Paten sie zu Görlitz verkaufft hette für sechzehen shockg undt acht undt vierzig groshen, unndt ein Casel, die war mit Peümlein, fur vierthalb schock groshen unndt sechs groshen, die sie dafür empfangen hette, in abgang der vorgenant Ihr shult. Auch wer Ihr mehr einvordten ein Casel mit zwenn Chorrocken vom blamsammet mit einem Pordten unndt bilten darauff gestukt, ein Rokh unndt grünn Casel mit zwenn chorröckh mit golt bestrenget eins madels, ein grün sameten Casell mit sambt vier Alben, stolen, Manipel, Humeral unndt gürtel, und mehr ein Akhsameten Casell, dieselbe Pfandt sie Ihr auch fürgenomen hette zue verkauffen vor der obgenanten Ihr shult wegen etc. Undt wan uns nue dasßelbe Closter, als gewant ist, dass wir sein vatterlich sorg sollen haben, unndt besonderlich, das Ihn solche Ornat unndt Meßgewant nicht zue unwürdten vergonnen undt verkaufft wordten, haben wir uns mit der vorgenanten frauen vereint, alß das sie die ehegenanten ornat undt Messegewant zue unsern Handten will geben unndt getrauen. Dafür wir Ihr funffzig shock groshen behemisher ausgericht undt bezalt haben in abgang der vorgenant Ihrer shuldte zue den zwentzig shock unndt vier unndt vierzig groshen, da sie fur die Kelch, Paten unndt Messgewant, als vorgeshrieben ist, empfangen hatt, doch unshädtlichen der vorgenanten Ehrsamen frauen unndt Ihren Erben an der ubrigen Ihrer shuldt unndt shuldtbrieff, als sey an haubtguet odter an shaden ehegefeuerdte, wir haben uns auch mit gutem billen darzue geben, wenne das ist, das der Abbt unndt das Conuent des vorgenanten Closters zue Nepomunk uns oder unsern nachkommen undt Convent solche 50 shocks groshen, die wir dan vor die vorgenanten Ornat undt Messgewant ausgeben haben, wiedterkehren, das wir unndt unser nachkommen In undt Irm Conuent dieselben wiedergeben undt antworten sollen, undt wollen ohn hindernis unndt wiedtersprechen, ohn geverdte. Solcher teydtung unndt vereinunge zue gehengnis haben wir gepeten die Ehrsamen unndt Weisen Cuntzen Baumgartten unndt Wilhelmen Ebmer beedte burger zue Nürnberg, die mit unndt bey diesen teydtung undt einung gewesen sein, das sie Ihre Insiegell an diesen brieff gehangen haben, deß wir ietzgenante Cuntz Baumgarten unndt Wilhelm Ebmer also bekennen, das uns unndt unsern Erben ohn shadten. Geben und geshehen zue Nürnberg am freytag vor S. Peters tag Cathedra genant, nach Christi unsers Herrn geburt vierzehen hundert unndt in den fünff unndt treysigsten jaren.