Dd. ff. magistro civium, scabinis et consulibus communitatis Zittavie Pragensis diocesis salutem etc. Cum, ut accepimus, dd. ff. conventui monasterii s. Spiritus Montisparacliti in Oyvin ordinis Celestinorum prope Zittaviam Pragensis diocesis, fundati per quondam bo. me. Carolum, Romanorum imperatorem et regem Boemie, ad apostolicam sedem nullo medio pertinentis, certos census annuos, assignatos eisdem monasterio et conventui imperpetuum tam per dictum Carolum, quam eciam postea per bo. me. Vincislaum (!), regem Bohemie, ad eorum cameram pertinentes, teneamini ad solvendum et in pluribus annis preteritis de eisdem satisfacere neglexeritis ac, nisi census integre persolvantur debiti tam de preterito quam presenti integre ac eciam in futurum, dictus conventus, in quo monachorum magnus numerus vite exemplaris est, ad quem plurimi boni viri clerici expoliati et expulsi ab Euclifistis (!)^a) refugium habent ibique aluntur, ac ipsum monasterium, quod in fortilicio positum est, sustentari et custodiri non valeant, ex hoc ingens periculum immineat, ne huiusmodi locus, cum aliunde nisi ex predictis censibus conservari et custodiri non possit, ad manus ipsorum hereticorum deveniat, quod si contingeret, quod deus avertat, quantum robur et stabilimentum ob aptitudinem loci prefatis hereticis esset ac quantam stragem et calamitatem ac dispendium fidelibus in partibus circumvicinis consistentibus ac vobis presertim inferre valeret, satis clarissime liquet, et vos optime scitis, cuius rei essetis in causa, quod ne eveniat, vigilantissime cum omnibus studiis obviandum est. Vestras igitur devociones, que, quantum huiusmodi periculum sit, inspicere debent, requirimus et hortamur in domino et nichilominus vobis et vestrum cuilibet stricte presencium tenore mandamus sub pena excommunicacionis, quam ipso facto, si secus fieret, incurratis, quatenus, si ita est, huiusmodi census debitos usque nunc integre omni mora sublata hinc ad sex menses proxime futuros et debendos imposterum singulis annis in terminis suis prefatis conventui et monasterio solvere debeatis, ut ipsa ad laudem divini nominis a tantis noxiis preserventur et ne in potestatem hereticorum ullatenus valeat pervenire. Sic enim in premissis vos habere curetis, ut speramus, quod de promptitudine obediencie apud nos et dictam sedem possitis merito commendari.

Datum Rome apud s. Petrum VIII. kal. Maii pontificatus nostri a. quinto.

Supra: (sin.) M. de Pisis; (dex.) De curia – In fine: (sin.) Coll. per me Ay. Gervasii; (dext.) B. de Puteo. ^a)Recte ,Wiklefistis'