Liben nockwere! Wir thun euch zu wissen, wie uns fliende rede gesagit wirt, das ir uns in euerm verdechtnisse habet und uns zu ungutt gedencket, bethen wir euch mit sunderlichem fleisse dienstlich, das ir uns aus euerm vordechtnis wolt lassen. Wenn wie Gotsche zu uns komen ist uff ein ylen und hat uns gebethen im schötzen zu leyen; das wir toten und wusten nicht, das is uff euch were et cetera. Wenn ir selbir wol wisset, das is itzunt in landen swere zu besorgen und unsicher ist, und wolden wir lieber euch und den euirn dyenen wenn missedinen. Wenne wir also wol unsers gnedigen herrn des koniges sein also ir und nicht Gotschen. Und getrauen euch allir furderunge wol, wenn wir alle zeit euch und den euern mit wollen et cetera. Geben am montage vor Laurencii in 25. jore.

Senatus Griffenberg.