Am fritage vor dem heiligen phingisttage noch Crists gebor virzenhundert jar donach in dem sebin und zwenzigisten jar ist zu Friberg geteidingit zwissin den hochgebornen fursten und herren herren Friederiche herzogin zu Sachsen und herrn Frideriche synem vetter beiden lantgraven in Doringen und margraven zu Missen uff eyne und dem edeln ern Heyneken Birken herren zum Honstein uff die andern seyten also, das der iczuntgenante er Hynke Birke sich zu den iczuntgenanten herren Friederiche und herrn Frideriche herzogen zu Sachsen lantgraven in Doringen und margraven zu Missen mit allen sinen slossen und merkten zu hulffe und bystehunge gethon hat widder die keczer zu Behemen, ern Sigmunden von Wartenberg und ouch allen den, dy des kryges zuschicken haben, und sal sich ouch von den partien mit nymande abe sunen, richten noch freden hinder der vorgnanten herren Friderichs und Friederichs wissen, willen und geheisse desselbin, glich die iczunt gnanten herren Friderich und Friderich gein herrn Hynken Birken herren zum Honstein ouch thun und halden sollen und sich nicht abesunen, richten noch friden von der partien keynen ane synen wissen und willen. Und das soliche teidinge, die so zwischen und obhenanten partien geteidingit synt, stete, ganz und unverucket gehalden werden, haben wir obingeschriben Friederich herzog zu Sachsen lantgrave in Doringen und margrave zu Missen unser insigil an dissen teidingis brieff lassen hengin, des wir Friedrich lantgrave in Doringen syn vetter uff diszmal hiran gerbuchen, und ich Heyneke Birke habe ouch myn insigel by des vorgenanten herren Friderichs herzogen zu Sachsen myns gendigen liben herren insigil lassen hengin.