Unsern grusz zuvor. Ersamen, lieben, besundern! Als ir den ersamen Thomas Schrotel, uwern ratesfrund zu uns gesant habt, also hat uns derselbe Thomas eygentlich erczelet und gesaget, wie ir tegelich von keczern zu Beheim swarlichen angefochten und gedrungen werdent und besorgent, daz sie uch furter swarlicher dringen und ubercziehen werdent, und uns von uwern wegen ernstlich gebeten, wer es sache, daz uch eynche noit anginge, daz wir uch dan gein den keczern beholffen und beraten sin wollen et cetera, han wir eigentlich und wol vernomen, und ist uns soliche uwer anfechtung sunderlichen leyd, und haben daruff demselben Thomas geantwurt: wer es sache, daz uch eynche not von den keczern zu Beheimen anginge mit belegern oder besitzen, daz wir uch ye nit laszen wollen. Doch also, ab uns auch eynche nott von denselben keczern anginge, daz ir uns desglichen auch widderumb tedent, als ir uns dan daz auch vore zugesaget habt, und als uch derselbe Thomas eigentlicher berichten wirdet. Darumb begeren wir von uch mit ganczem ernste und fliße, daz ir uch widder soliche iczgnante keczer zu Beheimen als fromme, erbare Cristen vestechlich halden und trostlich widder sie, so ir beste moget, sin werdet, als wir des keynen zwivel haben. Davon hoffen wir, daz ir gein dem almechtigen gode groszen lon und gein der werlt ere haben werdent, und wollent uch herinn als ernstlich bewisen und ertzeigen, als wir des eyn ganz und uncwivelich getruwen zu uch han. So wollen wir uch nicht laszen in maszen vor geschreben stet; und ob ir uns desglichen widderumb tun wollet, ob uns eynche noit von den keczern anginge, daz wollet uns mit uwerm eigen boten verschriben wiszen lassen. Geben zu Mergentheim des dinstags nach unser frawen tag Nativitatis anno et cetera xx quarto. Conrat, erbischoff zu Meenze, Ludwig, phatlzgrave by Ryne und herczoge in Beiern und Frederich marggrave zu Brandemburg et cetera, alle drey des heiligen Richs kurfursten.