Branda miseratione divina tituli sancti Clementis sacrosanctae Romanae ecclesiae presbyter cardinalis Placentinus vulgariter nuncupatus, in regno Boemiae ac Misnensi et Moraviae marchionatibus apostolicae sedis legatus dilecto nobis in Christo ... praeposito in Plaga ordinis Praemonstratensis Pataviensis diocesis salutem in domino sempiternam! Conquestus est nobis venerabilis pater Rutgerus abbas monasterii Sanctae Coronae Pragensis diocesis, quod nonnullae personae utriusque sexus et (?) homines super certis bonis, censibus, redditibus et decimis ad suum monasterium spectantibus et pertinentibus iniuriantur eidem. Ideoque discretioni tuae per haec nostra scripta auctoritate nostrae legationis mandamus, quatenus vocatis qui fuerint evocandi et auditis hincinde propositis quod iustum fuerit, appellatione remota, usuris cessantibus, debito fine decidas, faciens quod decreveris, per censuram ecclesiasticam firmiter observari, proviso ne dicti census contra Lateranensis statuta concilii sint impositi vel adaucti. Testes autem qui fuerint nominati, si se gratia, odio vel timore subtraxerint, censura simili appellatione cessante compellas veritati testimonium perhibere. In quorum testimonium praesentes literas fieri, nostrique sigilli iussimus appensione muniri. Datum Nurenbergae Bambergensis diocesis in domibus nostrae residentiae sub anno a nativitate domini millesimo quadringentesimo vicesimo secundo, indictione quinta decima, die vero Jovis tertia mensis Septembris, pontificatus sanctissimi in Christo patris et domini nostri domini Martini divina providentia papae quinti anno quinto.