Ich Düring von Halbil, hawptman ze der Ygla, bekenn, als ich dem hochgeboren fürsten herczog Albrechten, herczogen ze Österreich etc., meinem genädigen lieben herren, yeczund hie cze der Ygla gesöldent hab czwaÿ hundert werleicher ze rossen auf ain halbe quatember, die sich enden wïrdet des phincztags in den oster feyrtagen nachst künftig, also ist aim yegleichen werleichen ze rossen die halb quatember ze sold beschaiden fünff guldein und die sum in gold bringet tausent guldein, so ist auch hie innbegriffen, das der Teuffenpacher mit czwainczick pherden vierczechen tag gediennt hat, ee dann sich die halb quatember hat angefangen, den ist ze phantlosung gegeben dreÿssigk guldein, die sum also bringet an klainem gelt siben hundert czway und sibenczickk phunt vier schilling phening, also hat der vorgenante mein genadiger herr die vorgenanten soldner ïrs solts gancz ausgericht und beczalt und sag in darumb genczleich quit, ledig und los. Mit urkund, geben ze der Ygla am suntag Invocavit in der vasten anno Domini millesimo etc. vicesimo tercio.