Meinen frůntlichen grůs mit allir behegelichkeit zuvor. Besundern lieben herren und gunner, euwir liebe tue ich zu wissin, als ir mir geschreben hat mit eyner zedil in euwirm briffe, euwern dyner zu undirwiesin, wo her die funde, den die brife sprechen, zo wisset, der briff, der do spricht Jentsch, und derselbe man ist iczunt nicht eynhemisch noch was in der stat zu der selben zeit, sundir wenn her kommit und in der stat sein wirt, so wil ich en ym gerne antwortten von euertwegen; adir der andir briff, der do spricht Bomgarthen, zo wisset, das her gefangen ist und die stat helt en ynne von des koniges wegen und zu ym nicht kommen mochte; adir so ym got aus gehilfft, zo wil ich en ym gerne antworten. Auch lieben herren, welde ich euch gerne icht vorschriben von zitungen, wie is zu Breslaw stunde adir bliben worde, ich kan sein nicht gewissin. Noch kan euch nich geschriben von worer zitunge, sundir wissit, das unser gnediger herre der konig hot lossin vohen vil leute aus der gemeyne, und was her domit menit, das kan man noch nicht gewissin, sundir eyn teil synt auskommen und hot sie lossin aůsburgen, adir die andern wil man nich ausgeben zu burgen und was her mit en machen wil, das weis unsers herren gnode wol; nicht me kan ich euch geschriben zur desir zeit, sundir wenne ich icht hore adir dirfare von wohrhaftigen sachen und wie is bliben wirt, so wil ichs euwer liebe gerne zu wissen thuen. Gegebin am montage noch esto mihi.

Peter Raster genant Molschriber, mitburger zu Bresslaw.