Edler und gunstiger herre, unsern dinste zuuor. Wir gelauben Eurer Edlkeit nicht vorborgen sein, das daz kloster Dolan leider von den veinden überlist vnd czu iren henden worden ist. Doruff sie sich beginnen zu festen. Haben wir vns vůrgesäczt, wann Eurer Gnade mit dem hochgebornen fursten herczog Przemken eurem sweher den wir dorumb auch besenden dorczu geruchte zu tun, das wir euch neben unserm ganczen vermügen helfen wöllden. Darczu wolden wir auch besenden den herren Kreyer, der czu Wissaw leit, und wir wissen nicht anders denn das er auch dorczu komen und villeicht pucksen et cetera darczu bringen würde so das wir hoften ab got wil das selbige kloster vnd die veinde doruff zu geweldigen. Douon bitten wir mit fleissigen gebete uns brifflichen underweisen, ap Eurer Edlkeit durch unserr herren des Romischen kunigs und margraffen in Merhern und eines gemeinen nutczes und der armen leute willen ernstlich also dorczu thun wolde, und wenn, so wolden wir uns auch dorczu schicken, wanne sie yczunt leichter zu geweldigen wern, ee wanne sie sich festen danne hernach. Und des bitten wir euer antwurt. Gegeben an donerstag nach Dorothee.