Wir Sigmund von gotes gnaden römischer kunig zu allenczyten merer des richs vnd zu Vngern, zu Behem, Dalmacien, Croacien etc. kunig, bekennen vnd tun kunt offenbar mit disem brieff allen den, die in sehen oder hören lesen, das wir mit wolbedachtem müte, gütem rate vnd rechter wissen, vnd kuniglicher macht zu Behem, den geistlichen swestern des selhuses, das Mathes Adeler gestifft hat, vf sant Albrechts gassen gelegen, fur allen vffsetzung, geschosz, bete, stewer, lozung, wachen, reisen, diensten vnd allen andern beswernüsz, wie die genant sind, vszgenommen allein das gewonlich erbgeschoss, gefrÿet haben vnd freyen sy vnd ir nachkommen in crafft disz briefs vnd kuniglicher macht zu Behem, also das sy des frey, ledig, loze vnd furbasz uberhaben sin sollen, von allermeniclich vngehindert, vnd gebieten dorumb allen vnd iglichen houptlüten, ratmannen vnd der gantzen gemeyn vnser stat zu Breszlaw vnsern lieben getruen ernstlich mit disem brieff, das sy die egenannte swestern an solichen vnsern gnaden nicht hindern, noch irren, sunder dabÿ hanthaben schuczen vnd schirmen, als lieb in sÿ vnser swäre vngnade zuvermyden. Mit vrkund disz brieffs versigelt mit vnserm kuniglichen vffgedrucktem insigel. Geben zu Breszlaw nach Crists gebürt vierczehehundert jar vnd dornach in dem czweinczigisten jar, des nechsten montags nach dem heiligen Ostertag, vnsern riche des hungrischen etc. in dem viervnddrissigisten vnd des romischen in dem czehenden jaren.