Ich maister Wolfgang Roter, pogner ze Welles, ich maister Hanns Lewssinger, pogner zu Gallnewnkirchen, ich maister Ott Gressing, pogner ze der Freinstat, ich maister Niklas Krnegl und ich maister Peter auch baid pogner daselbs, ich maister Erhart, pogner ze Enns, ich maister Thaman Krewher, pogner ze Steir, ich maister Hanns pogner zu sannd Phantaleon, ich maister Hanns Smaczhawser, pogner zu Linczz, ich maister Hanns Pramhas und ich maister Stephan Steger baid pogner daselbs, ich maister Leonhart pogner zu Schawnberg und ich maister Peter, pogner zu sannd Peter in der Aw, bekennen all mit dem brief, das uns alln kund und gewissen ist, das Jorg pogner zu Krumbnaw, der walent gewesn ist bei dem Augustin daselbs, ains rechtten pfaffen sun ist, derselb pfaff ist genannt her Mertein Zendl, ieczn pfarrer zu sannd Dionisien, und desselben Jorgen mueter ist genant Elspet; dieselb Elspet ist noch hewt wonhaft bei demselben herrn Mertein, darzue haben wir uns auch an hewt aigenleich erfragtt und erkundet, das dieselb Elspet von jugent auf ir wönung bei dem egenannten herrn Mertein gehabt hat, und haben uns auch erfaren, wie dieselb Elspet unczt herchamen eeleichen man nie gehabet hab. Das sagn und sprechn wir obgenant all bei unsern trewn in aidesstat und sagn auch das weder durch lieb noch durch neid, sunder durch lawtterer warhait willn ungeuerlich. Mit urkunt des briefs versigelt mit unsern egenanter maister Wolfgang Roter, pogner zu Wells und maister Hanns Lewssinger, pogner zu Gallnewnkirchen paider aufgedrukchten insigeln und mit unser von erst maister Erhart pogner zu Enns und maister Hanns, pogner ze sannd Panthaleon und maister Otten Gressing und maister Niklos Krnegl baid pogner ze der Freinstat und mit meins obgenanten maister Hannsen Promhasen pogner zu Linczz aufgedrukchten petschaften. Und wann wir die andern unsre petschaft bei uns nicht heten, so haben wir die obgenanten all umb ire insigel und petschaft gebeten und luben auch mit unsern trewn, alles das mit sambt in war ze sein und ze hallten, das oben an dem brief geschriben stet. Geben an Sonntag in der vasten, als man singt Oculi, anno domini millesimo CCCC^mo tricesimo V.