Vnsern willigen Dinste czuuor liben herren. Als ir vnd wir vnsere potschafft zu vnserm gnedigen herren dem konige gehabt haben, also hat er vns fleissig verschriben, das wir sullen komen gen der Miess, als wir euch des seinen briff hye innen senden beslossen, vnd sein volk leyt yczund vor Cladraw mit ganczer macht. Vnd wir besorgen, wir müssen darnach czyhen für Glataw vnd wir haben mer dann XV^C man, die wir teglich mûssen speisen. Darnach wisst euch czu richten mit kôst vnd mit gelt sunderlich mit vastenspeiss. Vnd was wir czu der Miese von vnsers gnedigen herren gnade vernemen, das wollen wir euch wol lassen wissen, vnd was ewr maynunge darynne ist, das lat vns auch beschriben wider wissen. Auch lieben herren sullet ir den briff mit ganczem fleisse behalten. Geben an donerstag czu Tachaw vmb Vesper vor conuersione sancti Pauli.