Liebe freunde. Als Ir uns verschriben habt, wie Ir unserm gnedigen herren Fridreich dem marggrafen auch verschriben und seinen gnaden und uns abschrift ... der stat zu Prüx briefs da mit habt gesandt et cetera, das haben wir wol vernomen. Nu was wir ewer weisheit bisher in denselben sachen zu furdrung haben tun mugen, das sein wir willig gewesen und lassen ewr frewntschaft wissen, daz der vorgenant unser gnediger herre Fridreich der marggraf erst auf gestern von uns geritten ist, und wir niht anders wissen, denn daz er kürtzlich wider zu uns komen werde, so wellen wir dieselbe sache von ewern wegen gern an sein gnade bringen und ewch zu fürdrung unsern fleisz fürbas auch gern darinnen tun. Denn wo wir ewer ersamkeit lieb oder dienst oc. Datum feria VI^a ante Petri ad vincula.