Archidiaconatus Bechinensis. — Simon etc. Vniuersis et singulis dd. decanis, plebanis, viceplebanis, ecclesiarum et capellarum rectoribus et aliis beneficiatis ac clero et populo per et infra archidyaconatum Bechinensem constitutis ceterisque, ad quos ipsius archidyaconi Bechinensis recepcio communiter et diuisim spectat etc. salutem. Noueritis, quod vacante dicto archidyaconatu Bechinensi, cuius collacio ad d. archiepiscopum Prag. protunc existentem spectat, per mortem d. Cunczonis, olim episcopi Olomucensis, nos considerantes nunc sede archiepiscopali Prag. vacante, quod ex dicti archidiaconatus vacacione possent plurima euenire incomoda, ignorantesque, quando per sedem apostolicam ipsi eccl. Prag. de archiepiscopo prouidebitur, deliberacione prehabita matura de nonnullorum iuris peritorum consilio de archidiacono Bechinensi, ne ipsius collacio ad superiorem deuoluatur, ac negligenciam, que ex dicta vacacione sedis archiepiscopalis posset prouenire, in dicti archidiaconatus prouisione supplere volentes, de archidiacono eiusdem archidiaconatus Bechinensis decreuimus ex officio nostri administratoratus prouidendum. Ideo attendentes laudabilia probitatis et uirtutum merita ac morum honestatem, quibus aput nos d. Johannes de Loprzieticz, presbiter Prag. dioc., fidedigno commendatur testimonio, eidem dictum archidiaconatum Bechinensem cum omnibus iuribus et pertinenciis suis conferimus sibique de eodem prouidemus ac eundem d. Johannem in persona honesti viri Pauli de Holubicz, notarii publici, eiusdem d. Johannis procuratoris legittimi, de cuius procuracionis mandato ex instrumento publico per Nicolaum quondam Thome de Netholicz, clericum Prag. dioc. publicum notarium, confecto constabat euidenter, rectorem dicti archidiaconatus instituimus stallum in choro eccl. Prag., ad quem et ad quos ex officio spectat, mandantes assignari etc. Dat. ut supra.