Nos Sigismundus, Dei gratia Romanorum Rex semper Augustus, ac Hungariae, Bohemiae, Dalmatiae, Croatiae etc. Rex. Memoriae commendamus tenore praesentium significantes, quibus expedit, universis: Quod nos tum pro fidelitatibus et laude dignorum obsequiorum virtuosis meritis, fidelium nostrorum Emerici et Nicolai, filiorum condam Emerici de Simonyi, per ipsos nobis et sacro nostro regio diademati, in plerisque nostris et regni nostri arduis agendis sub temporum et locorum varietatibus et signanter in nostro exercitu contra sceleratissimos haereticae pravitatis sectatores Hussitas, Dei et nostros ac totius christianitatis notorios aemulos et rebelles pro exterenda eorum protervia et damnabili secta elidenda, pridem instaurato, cum omni ipsorum fidelitatis constantia, laudabiliter exhibitis et impensis; tum etiam ad humillimae supplicationis instantiam fidelis nostri dilecti Stiborii, filii condam Stiborii Vaivodae de Bolondoch, pro parte eorumdem Emerici et Nicolai nobis superinde porrectae, quoddam fortalitium seu castellum lapideum in facie dictae eorum possessionis Simony voluntate et scitu per ipsos aedificatum et nondum in eius constructione et aedificio perfectum, eisdem Emerico et Nicolao perficiendi, consummandi et pro eorum utiliori commodo et statu quietiori muniendi fortificandi et altius extendendi, per ipsosque et illorum haeredes universos perpetuis successivis temporibus tenendi, habendi, regendi et possidendi, ex speciali nostrae Maiestatis gratia plenam, meram et omnimodam annuimus et concedimus potestatis facultatem, sine tamen praeiudicio iuris alieni. Harum nostrarum literarum, quibus secretum sigillum nostrum duximus appendendum, vigore et testimonio mediante. Datum Trenchinii Sabbatho proximo ante festum Epiphaniarum Domini. Anno eiusdem MCCCCXXVI. Regnorum nostrorum Anno Hungariae etc. XXXIX. Romanorum XVI. Bohemiae VI.