Edler lieber sweher, unser freuntlich dienst wisset bevor. Als ir uns iez geschriben und des vom Neuhaus, auch des von Salczburg, brief und abgeschrift und eur antwurt darauf zugeschikt habt, haben wir vernomen und danken euer freuntschaft eurs guten willen, domit ir in den sachen von unsern wegen gemueet seit, mit ganzem fleiz. Und lassen eu wissen, das uns der von Salczburg in unserm rechten erb merkleich irrung und enzihen getan hat wider altes herchomen und wider unser besigelt brif und urkund, so wir darumb haben, als ir derselbn unserr gerechtikait, auch der artikl der ingriff, so uns von dem pischof und den seinen dawider sind ergangen, mit abschriften eu in unsern briefen vor zugesant, gueten tail wol underweiset seit. So hat auch eur freuntschaft an unserem vodern schreiben wol verstanden solich verlassen, so der techant zu Passaw am nagsten zu Lincz mit uns getan hat, in dem der bischof von Salczburg als nu mit seinem rechtpreten solich zug fur sich nimbt, dem uns also wider unser gerechtikait, so wir haben, swer und nicht fuegleichen were nachzegeen. Doch wie darumb sei, so haben wir durch merers gelimphen willen mit demselben bischof solich wege noch fur uns genomen und eins tags uberainechomen, den wir bedenhalben personleich miteinander besuchen sollen, als ir an der abgeschrift hieinne ligend auch vernemen werdet. Darauf wir eur freuntschaft bitten in ganzem fleisse, ir wellet uns zu demselben tag eur rete ainen durch gruntleicherr underweisung willen schiken. So haben wir dem von Neuhaus sunder geschribn und gebeten, uns darauf mit der seinen ainem auch also beigestentig ze sein. Das wellen wir umb eur freuntschaft in solichen oder merern sachen willicleich gern verdienen. Geben zu Schawnberg an montag sand Marcus tag ewangeliste, anno et cetera XXXV^to.

Johanns grave zu Schawenberg der Elter.