Vnsern dinst ersamen vnd weisen. Alz euch wol wissenlich ist, alz vnser gnedige herren die kurfursten mit sampt andern fursten, herrn vnd steten eins czugs gein Behemen auf die vnglaubigen zu Franckfurt eins wurden, zu sulchem czug fursten, herrn ritter vnd knecht vnd stet anrufften vnd begerten an die, die sy denn meynten (sic), die in ewtwas pflichtig vnd pillichen beholffen sein solten zn eynem sulchen czug. Also rufften wir auch an vnd begerten an vnsern man vnd lehenlewt zu Redwitz vnd Dorffleins vnd ettlich ander vnd paten sie mit fleissiger pete einer petlichen pet nemlich dy von Redwicz vnd Dorffleins vmb ein wagen vns einzuschicken auf vnser zerung vnd kost zu dem zug auff dy vngelaubigen. Daz sie vns also abslugen vnd vngehorsam gewest sein, vnd nemlich dy andern von Redwicz, dy nicht vnser man vnd lehenlewt sein, dy vns mit iren reten vnd anweysung darumb pracht haben, daz vns vnser man vnd lehenlewt ein sulchs versagt haben vnd nicht gehorsam gewest sein mochten wir im sulch obgeschriben vm ein sulchs gestraffen ab ewch daz icht anging, des wir doch nicht enhoffen. Darvm wolten wir ewch von eren vnd rechts wegen nichts schuldig sein czu antworten. Geben am montag vor sand Gallentag ym siben vnd zwainczigsten iar. Geben vnter herrn Hanzen vnd Hansen von Sparneck zum Stein insigel, des wir zu disen zeiten gebrauchen.