Ich Düring von Halbil, hawptman ze der Ygla, bekenn, als ich dem hochgeboren fürsten, herczog Albrechten, herczogen ze Österreich etc., meinem genädigen lieben herren yeczund hie ze der Ygla gesoldent hab zwaÿ hundert werleicher ze rossen und funfczick fuschnecht von der Etsch auf ain halbs viertail iars, das sich enden wirdet auf den nachst künftigen phincztag vor sand Margreten tag, nun ist aim yegleichen werleichen ze rossen das halb viertail iars cze sold beschaiden fünff guldein, die sum bringet tawsent guldein; so ist aim yegleichen füschnecht die zeit auch ze sold beschaiden zwaÿ phunt drey schilling funfczechen phening, die sum bringet hundert ainsundczwainczick phunt siben schilling phening der vorgenanten geraisigen und fuschnecht solt, bringt in klain gelt alles in sum acht hundert ainsundsibenczick phunt siben schilling phening. Also hat der vorgenante mein genädiger herr die vorgenanten soldnär irs solts die zeit gancz ausgericht und beczalt, darumb sag ich in genczleich quit, ledig und los. Mit urkund, geben ze der Ygla am süntag vor sand Vrbans tag anno Domini etc. vicesimo tercio.