Unser sunderliche gunst und alles gueth, ediln et cetera.

Wir lassen euch wissen, das unser gnaden herr der konig von deme tage, den er mit den Hungerischen herren zu Waredeyn gehalden hot, als nue am sonnabende keigin Wazen wedir komen ist, do sich denne seine gnade mit en nach alle seynem willen geeynet hod, also das sie em alle seyner kriege beylegin wellen, und em ouch mit leib und gute keigin yderman helffin; und also dasz seine gnaden vorbasser ane seumen dirhaben wil, und gleich uff dem wege nue ist zu den kurfürsten zu zihen. Dorumb wir alleine durch sulcher botschaft wille, als uns unser herre zum konige gesandt hatte, mit em zu dem tage zihen müssen. Bitten wir euch mit besunderem fleysse uns dorumb nicht zu verdenken, das wir also lange von euch sein müssen. Und wellet alle diste fleissiger helffin zu sehin et cetera. Geben zu Grane in vigilia Johannis baptistae.

Heinrich, Rumpold genannt, von gotes gnaden herzog und herre zu Grossen Glogaw und foyt zu Budissin et cetera den ediln, gestrengin, erbern und weysen allen herren, mannen, rittern und knechtin, burgermeistern und rathin der land und stete zu Budessin et cetera.