Julianus miseracione diuina sancte romane ecclesie sancti Angeli dyaconus cardinalis, in Germania apostolice sedis legatus dilectis nobis in Cristo fidelibus sacerdotibus ac clericis per regnum Boemie constitutis salutem in domino. Sincere deuocionis affectus quem ad nos et romanam geritis ecclesiam non indigne meretur, ut peticionibus uestris illis, presertim quas ex deuocionis feruore prodire conspicimus, quantum cum deo possumus fauorabiliter annuamus, hinc est quod nos deuotis uestris supplicacionibus inclinati, ut liceat uobis in ecclesiis exustis et execratis habere viatica seu altaria portatilia super quibuscum debita reuerencia et honore coram uestra plebe fideli possitis missam et alia diuina officia celebrare deuocioni uestre auctoritate nostra tenore presencium indulgemus. Datum Basilee die xxii^a decembris anno domini millesimo cccc xxxiiii^o, indictione xii^a, pontificatus sanctissimi in Christo patris et domini nostri domini Eugenii diuina prouidencia pape quarti anno quarto.