Ich Wilhalm der Waldner bekenn, als ich dem hochgeboren fürsten herczog Albrechten, herczogen ze Osterreich etc., meinem genädigen lieben herren yeczund hie ze der Ygla gesöldent hab hundert und zwen werleicher ze rossen auf ain halbs viertail jars, das sich angefengt hat am phincztag vor sand Kolmans tag und sich enden wïrdet am suntag vor Katrein tag nachst künftig, also ist aim yegleichen werleichen ze rossen die czeit ze sold beschaiden fünff guldein, das in sum bringet fünff hundert und zechen guldein, also hat der vorgenante mein genädiger herr die vorgenanten söldner die zeit irs solts gancz ausgericht und beczalt und sag in darumb genczleich quit, ledig und los. Mit urkund, geben ze der Ygla am phincztag vor sand Kolmans tag anno Domini etc. vicesimo tercio.