Wir Friderich von gotis gnaden lantgraue in Doringen vnd marcgraue zcu Missen bekennen …. Als der spital vor vnser stat Dreßden an der Elbe gelegen von brandis vnd verterpenisses wegin der verdampten ketzcere verbrant vnd in den grunt verterbt ist vnd nu in das dritte iar sollichs verterpnisses halben wuste vnd vngebuwet gelegen hat, vnd auch daz bruckenampt von wegin der kirchen des heiligen Cruczis auch grossen verterplichen schaden an den gewelben der brucken, die von oberiges grossen gewessirs wegin ingefallen sint, gnomen hat, solliche ampte beide ane hulffe vnd rat dez ratis vnd stat Dreßden nicht wol mogen widder gebuwet vnd uffbracht werden, als wir daz mit vnserm rate erkant vnd betrachtit habin, vnd uff daz nu daz derselbe spital widder uffbracht vnd auch die brucke widder gebuwet vnd beide ampte in redelich wesen mogen bracht vnd wol vorgestanden werde, so habin wir den genanten spital vnd auch das bruckenampt den ersamen burgermeistern, ratmannen vnd burgern vnser stat Dreßden vnsern lieben getruwen zcehen iare nest nocheynander volgende von dato dieses brieues ingethan, verlassin vnd beuolhen, intun, verlassin vnd beuelhen yn die also geinwerticlichen mit vnd in crafft dieses brieues, den genanten spital vnd brucken widder zcubuwen vnd uffzcubrengen, spittalmeister vnd bruckenmeister die zciet daruber zcu setzcen vnd zcu entsetzcen vnd die mit allen redelichen sachen noch dem besten zcu vrowesen vnd zcu bestellen, doch vnschedelichen vns, vnsern erben vnd nochkomen an vnsern dinsten, die wir bißher daran gehabt vnd noch daran haben, ane geuerde. Vnd gebin yn des zcu bekentenisse diesen vnsern offin brieff versiegelt mit vnserm anhangenden ingesigil. Gebin zcu Dreßden noch Cristi geburt vierczen hundirt iar darnoch in dem zcwei vnd drissigsten iare am fritage noch Conceptionis beatae Mariae virginis.