L. Fr. Als Ir vns nehst bey vnserm diener verschriben vnd geantwurtt vnd darnach ewern botten, der zu Prag gewesen was, zu vns gesandt habt, vns derselb sache vnd gelegenheit müntlich zu vnterrichten, als er auch getan hat, das haben wir zu sunderer frewntschaft von ewch vernomen vnd danken des ewer weisheit mit ganczem fleisz. Nu haben wir vnter andern worten von ewerm botten verstanden, wie die Lantherren, stett, gemeyn vnd andere in Beheim auf den nehstuergangen Jarstag zu Prag zusamen komen süllen seyn oc. Bitten wir ewr ersamkeit fleissiclich ewern fleisz darczu zu tun, wie Ir vernemen mugt, ob das also geschehen sey, vnd was vnd wie sie besliessen vnd abscheiden, besunder von der botschaft wegen, die sie zum Concilij gen Basel tun sölten, vnd daz vns denn ewr weisheit von denselben dingen allen bey ewer botschaft auf vnser köst vnuerczögenlich verschreiben vnd verkünden well, alsuil ewch denn füklich sey vnd vus gebüre, vnd ewch darynnen vmb vnsern willen so günsticlich beweiset, als wir ewer guten frewntschaft sunderlich wol getrawen. So ist vns denn auf diselbe zeit ein brief von Basel geantwurtt worden, der ewer weisheit von vnserm vatter vnd Ierren …. Dem Cardinal sancti Angelj steet, den wir ewch hiemit auch in gut schiken. Denn wo wir ewer ersamkeit Lieb oder Dienst etc. Datum ut supra sabato ante Epiphania Domini.