Friedreich von gotes gnaden Herczog ze Österreich et cetera. Getrewr lieber. Als wir unser lantschaft der graftschaft Tirol auf den nagstvergangen sand Peters und sand Pauls tag gen Boczen belegt haben von der hussen wegen, dahin aber der merer tail nich komen ist, sünder die da gewesen sind, überrayn worden sein, das in darumb ain ander tag gesetzt werde, als emphelhen wir dir aber ernstlich und begern, das du noch von hewt über 14 tag gen Boczen kömest, als wir das den andern auch geschriben haben und wir unser anwelt darczu auch schickchen wellen, damit man da uberayn werde, wir wir und ir die sach furhanden nemen, das wir von andern fürsten und kristengelaubigen nicht gemerkcht werden, davon so lasse dich des nichtz irrn bey unsern hulden und gnaden. Geben zu Insprugg an süntag nach sand Ulreichstag anno domini et cetera im 1427 jar. Dominus dux in consilio.