Stepfan Coler unerm lieben burger und ratgesellen.

Lieber Stephan! Als dir wissend ist, wie wir unserm herren herczog Heinrich von Peyern geschriben und seinen gnaden denselben brief bei ein unserm einrüsser gesant haben, der hat den herczog zu Burkhausn gefunden und der rete gar lützel bei im; doch hat uns der herre schriftlich bei im geantwurtt auf meinung, daz er sein rete kürczlich zu im verbotten und uns bei sein selbs botschaft ein antwurt darumb wissen alssen welle. So hat Berchtold Volkmer dazwisen her verschriben, wie desselben herren rete mit im auch etwas davon geredt haben, als du das nu wol macht von im haben vernomen oder noch vernemen. Auch wiss, als Sigmund Stromer ieczunt von Eger bis gein Ellbogen komen was hienein gen Prag zu vollreiten, den haben die von Elbogen niht wellen noch getrawen beleiten his an die stat, da in des Jacubkos geleit genomen söllt haben. Und von treffenlicher warnung wegen hingebens, daz im geschehen were, hat er widerkert und kam am vordern tag zu uns herheim und hat uns gesagt, daz er den erwirdigen vättern und herren … des consiliis botschaft von Eger als bald einen boten gen Prag gesandt und denselben handel eigenlich geschriben hab. So ist uns am vordern tag ein brief von unserm gnedigisten herren … dem Römischen keiser et cetera komen, daran uns sein keiserlich gnade schreibt, daz er von der stucke der heiligen cristenheit und des reichs notdurft wegen, darumb denn das ieczig concilii gemacht worden sei, unser herren … die kurfursten, fürsten und stette gen Basel berüfft und vordert auf Andree schierist und begert unser erber botschaft auch darczu zu senden, als wir meinen, daz du das nu auch wol vernommen habst. Darauf wellen wir gedacht sein. So schreib du uns dazwischen auch deine rat und meinung darumb und was dir sust begegen des notdurft sei, als wir niht zweifeln, daz du selbs auch gern tust. Datum sub sigillo Erhardi Haller magistri civium, feria V^a post Martini.