Friderich und Sigmund gebrüder, von gotes gnaden herzogen zu Sachsen, den edlen, gestrengin und ersamen weisen ern Albrechte von Colditz vorweser, landmanne, bürgermeister und rathmanne der land und stete Budissin, Gorlitz, Camentz et cetera, unsern libin besundern. Uch mag vilichte wol wissentlich seyn, das der fride, den wir mit den von Magdeburg bis daher gelyden haben, nu uff sente Walpurgen tag 1. Mai schirsten usgehit. Dorumb wir denne got dem almechtigen zu lobe et cetera uff den fritag 29. April nach sente Marcustage eyn felt machen, darinne selbir seyn, und iren mutwillen mit euer und ander unser herrn und fründe hülffe weren wollen. Und davor begeren wir von uch mit bittendem vlisse, das ir uns under uch erbern manschafften, steten und dorffern bestellen wollet 50 mit glefenyen, an pferden, harnische wol irzüget und wolgewapent, darzu 500 schützen zu fusse uff waynen mit steinbüchsen, hantbüchsen, armbrüsten, schüffeln und hauwen, und sünderlich was zum streyte gehört. Und dieselben uff die nehste mitewochen 27. April nach sente Marcus tage gein Sonnenwalde schicket, von dannen fürder et cetera. Und dorbey jedermenniglichen vorkündigen lasset, wer von guttem willen mitte zyhet, was der in der fyende lande erwürbet, das er das behalden sülle et cetera. Gegeben zu Missen am sontage judica anno domini 1435.