Wir Heinrich der junger genant Rumpold von gotis gnoden herczog in Slesien herre zcu grossen Glogaw ffoyt zcu Budissin und Gorlicz et cetera bekennen mit unserm offen briffe vor allen dy en sehen, adir horin lesin, so als uns dy gestrengen und tuchtigen ritter und knechte der manschaffte der lande und dy erbarn und weysen burgirmeister und ratmanne der stete Budissin, Gorlicz, Sittaw, Luban, Lobaw und Camenecz noch geheisse und gebote des allir durchluchtigisten ffursten und hern hern Sigmunds des Romischen konigs zcu allen geczeithen merer des reichs zcu Hvngern und Behemen et cetera konig zcu eynem ffoyte uffgenomen haben zcu seynem willen und uff seyn widdirriffen und uns zcu unsers hern des konigs eren und der lande und stete bestis und zcu der strossen fredsamkeit gehorsam zcu seyn globit haben, dorumb zo habin wir den egenan manschafften der lande und ratmanen der stete und den gemeynden arm un reich do selbist widder globit und globin en inkraft dis briffes, das wir sie alle und iczlichen besundern bey allin eren briffen, priuilegien, hantfestin, gnoden gerichten, rechtin, freyheichen und gutin gewonheithen dy sie von aldirs von konige Johan, keyser Karll und andern konigen, ffursten und hern und besundern von unserm gnedigen hern konig Sigimunde dirworbin habin und noch durwerbin mogin wollen lossin bleibin und genigelich sie der lossin gebruchen und en alle und iczliche ere vorgenant briffe, hantfesten, gerichte, rechte gewonheite gnoden und freyheite ane allis arg bessirn und nicht ergern und lande und stete und dy strossen schirmen und schuczen wollin noch unserm bestin vormogen ouch globin wir den egenenat manschafften der lande und den burgermeistern und ratmannen der stete und den gemeydin arm und reich do selbist ab der egenant der Romische und Behemische et cetera konig uns keynerleye sume geld uff den megnant landen und steten vor schreiben gebin adir vorplhenden welde sulchen vorschreibunge vorphendunge noch gobe sullin wir und wollin der nicht uff nemen domethe den egenanten landen und steten ere gnoden freyheite gerichte rechte und gute gewonheite mochtin geswechit werdin und ab uns adir sust ymand von unsern wegen keynerleie briffe zcuge schreiben worden do methe dy gnaden lande und stete aneren freiheiten und gnoden mochtin geswechit werdin dy briffe sullin en allin und iczlichen nicht schadin brengen inkeyner weise und wollin und sullen alle obheschrebene rede puncte und artikil stete unde gancz halden ane arg alzo lange als wir der lande und stete ffoyt und vorwesir sein, des zcu bekentnisse habin wir unser ungesegil an desin offin briff lossin hengen. Der gegebin ist zcu Budissin noch Cristi gebort virczhenhundirt ior dornoch undem czwenczigisten iore am nestin dornstage noch Galli.