Sigmund et cetera Romischer konig et cetera. Edler liber getruwer! Wir haben euch vormals geschriben von sulcher nome und phendung wegen, dy herzog Hinrich von Grossenglogaw an unsern kaufflüten von Nürenberg getan und begangen had, und euch gebeten darzu zu thun noch allim euerm vormögen, damit den unsern das ir wedir werden möchte. Nu ist biszher von nymand nichts dorzu getan wurden, das uns veste wedir ist, nachdem und dy ehgenanten von Nürenberg unbillig für dy cron zu Behem phantbar sien sullen. So haben wir ouch dem vorgenanten herzog Hinrichen ufft recht geboten vor unsern mannen und geschhaffnern. Das wir aber von em ny haben bekommen mögen. Sunder er tribet also synen mutwillen wider sien gelübde und eid, dy er uns zwir getan had. Und sintemal uns und den unsern von em kein glich noch billichkeit wedirfarn mag, so gebiten und irmanen wir uch von koniglicher macht ernstlich und vestiglich mit desim brige, das ir den genanten herzog Hinrichen noch undirweisit und mit scheinbarm ernst darzu tut und angriffet, damete unsern ehegenanten bürgern das ir wedir werden möge. Und sehet dorum vor unser und der cron und euir allir ere et cetera. Gegeben zu Gewin an sent Petirs und Pauls tage unsers reichs des Ungarischen et cetera in dem 42., des Römischen in dem 18. und des Behmischen in dem 8. jaren.