Fritcze von Landskron, Heincze Snorbein, Niclas Hoff, Thyme Schellindorff, Heincze Snorbein, Gorge Snorbein und Seiffried Pretewicz haben gelobt mit gesamptir hand ungesundirt vor Melchior Hoff in solchir mosse also, als her den ketczern uff Meristaw wieder die heilige kirche und diesen landen beygelegin und gehulffen hat, das her ken der kirchen abelegen und recht tun sal, als sich das geboret und eyn solchs wieder inczubrengen, was her doran gebrochin hat, und wieder die ketczer zu seyn noch alle seynem vormogen und nymmermer wieder czu in zu treten, sundir den cristen gelowben helffen vorfechtin zu ewigen czeyten, und uff sulche gelobde habin wir in vorsehn, was her ken uns und der stat gebrochen hat uff eyn nymme tun.

Heincze Snorrebein, Nickal Hoff und Gorge Snorbein haben globt et cetera vor Mykoschken Kottolinsken von Falkenberg aws dem lande also, als her den bosen ungetrawen ketczern von Behem iren unglowben und ketczerey hat helffen sterken, in bey gelegen und die land hat helffen beschedigen und vorterben, das her dorumme gen der heiligen muter der kirchen buslichen abelegen sal et cetera.