Hannus von Polencz voyt zu Lusitz dem wolgebornen und edlen herrn Hinriche burggraffin zu Myssin et cetera, herrn Albrechte von Colditz et cetera, landmannen und rathmannen der 6 lande und stete Budissin et cetera, mynen liben herren und fründen et cetera.

Ich thu uch zu wissin, das mir also hint umb den ersten sloff botschafft komen ist von Behemen, der ich gantz gleube, das die Weysen und die Thaborn gantz eynis sind als vor eynen man, das sy nu bis sontag 11. Dezember uff eynem tage sullen sien zu Prage, und sullen des beslissen und mit briffen under andern worten, wess sy ein würden, das es daby bleybe. Das wird der Procop uff dem tage mit seins selbist leybe sein. Und die Weisen sind gereit von iren mithelffern also gescheiden, das sy mit alle irer macht mit sampt den Thaborn, nuwen und alden, wullin uffsien und meinen zu zihen in die 6 stete und da zu besetzen die Sittau und die Lobaw und fürder in deme land zu gewinnen, was sy künnen.

Liben herren und fründe! Von den 6 landen und steten werdet ir nue dencken, dass 400 werhafftige von uch in die stad qwemen. Ich welde ryten und besuchen noch vor desin heiligen tagen mynen herren von Sachsen, wo ich den finde, und hoffte mit em vorzubrengen, das her uch 200 werhafftiger lüte in dy stat zur Sittaw sendin würde. Und werdet da eyne mit mynem herr dem burggraffen, das uch der von mynis herr des landgraffen wegen not thun würde. Und ob der zog uff gene sietin in ere land gehin würde uff eyn ander zyt, das ir en weder 300 werhaffte weldet senden in der drier stete eine, Friberg, Pirne ader Dreszden, und wy ir uch des mit mynem herr dem burggrafin voreynet umb die kest, wer deme andern die synen sente et cetera.

Libin herren und fründe, ich habe keynen zog noch nicht vornommen in dese lande, an deme sy also gelegin. Darumb so bete ich uch das beste davor zu gedencken et cetera. So düncket mich gut, ir wullit zwene rathmanne von Budissin und von Gorlitz, namelichin Hanse Puntzel und Hannse Kanitz, ab dy da nicht weren, ander zwene zu mir senden, als balde ir uch sy zu Bischoffwerde schiedet, kegin Senfftinberg. Und sagit Nickel von Polentz mynem vettern, das her mit en riete. So wil ich sy wedir von mir lassen geleitin biss kegen Camentz odir kegin Hewirszwerde et cetera. Kunde ich geyten, ich wolt is ungerne vorhaldin habin, so ist mirs nicht zu thun, das ich in desin laufftin varen solde. Geben zu Senfftenberg am montage vor mitternach zwischen 10 und 11 nach conceptionis Marie.