In nomine domini amen. Ego Sazama civis Maioris Civitatis Pragensis, evidencia presencium cunctis notum facio et publice protestor, quod quamvis circumplexus corporis egritudine, sana tamen mente et perfruens omnimoda racione, testamentum meum ultimum et finale de et ex omnibus bonis meis mobilibus et immobilibus a Deo altissimo michi datis et concessis, ne de hiis meam post mortem inter posteros seu amicos meos quoscunque aliqua litis suboriatur materia, condo, facio et dispono per omnia in hunc modum: Lego siquidem et dono domum meam, quam inhabito retro Bethleem in acie, et aliam meam domum cum curia et orto, quas habeo in Nova Civitate Pragensi, nec non alia omnia bona mea mobilia et immobilia intra et extra civitatem Pragensem ubicunque locorum reperta, quibuscumque nominibus possint designari, nichil penitus eximendo, et presertim decem sexag. gr. census annui et perpetui in hereditatibus Sazame in Horzessowicz, Ludmille conthorali mee carissime ad habendum, tenendum hereditarie et pacifice possidendum, sic, quod ipsa, me defuncto, cum eisdem singulis bonis per me derelictis faciendi, dimittendi et disponendi abs quolibet impedimento plenariam obtineat potestatem iuxta libitum voluntatis sue. Ceterum lego atque dono omnia et singula debita michi per infrascriptas personus contracta et debitorie obligata Ludmille conthorali mee prefate, ab eisdem repetendum, exigendum, percipiendum et in usus proprios convertendum; videlicet Chwal de Dokez dimidiam sextam sexag. gr. dominus Mysska miles triginta sexag. gr., Coyata viginti sexag. gr., super quo dedit septem sexag., Przibico de Zwiestowa tres sexag. gr. pro fideiussoria caucione fratris sui de Odlochowicz. Horum in evidencia sigilla prudentum virorum Petri iudicis, Wenceslai Straboch et Johannis de Zacz, consulum juratorum, civium Maioris Civitatis Pragensis, ad speciales preces meas presentibus sunt appensa. Datum feria secunda ante festum s. Wenceslai anno domini MCCCCXIX.