Wir Heinrich von Lazan von kunglicher gewalt von Behemen houptman zu Breslaw bekennen offentlichen in disem kegen wortigen brife, das vor uns gestanden ist der tochtige Franczke von Grzobkowicz wolgesund leibes und synnen mit wolner bedachtem muter und hat sich vorczigen und ist williglichen abegetreten kegin dem tochtigen hern Johansen von Smarschow altaristen des altaris czu Hermansdorff und zu desselbin altaris handen alles rechtin und allir ansprache zuuorsichts und forderunge das im von naturlicher erfolgunge und brudirlichem angefelle hette mocht geboren nu adir hernochmols inkunfftigen czeiten, an den czinsen die zu dem selbin alter gehoren von dem tochtigen Niclasen Persken seinem liben brudir, der ouch dieselbin czinse zu dem vorgenanten alter zu Hermansdorff benumet hat und undir einer offenbaren schafft vor gegebin und geschtiben hat und ouch dorumb hat gelobet nymermer zureden zuforden noch anczusprechen, wider uswendig der geistlicher gerichte adir werltlicher noch ynnewendig czuhant und doselbist stund der woltochtige Hannos Wiltberg unsir undirhoupt man zu Breslaw und hat bekant, das mit im der erwirdige in got vater und here her Conrad von gotis gnaden bischoff zu Breslaw einen ganczen entscheid und volkomene vorrichtunge czwuschen dem woltochtigen Heinczen vom Lazan houptman zur Sweidenicz an eime und hern Johansen von Smarschow dem vorgenanten altaristen des vorgenanten altaris zu Hermansdorff am andern teile, gemacht und getedinget habin, also das alle czinse des obgeschriben altaris fridelich und ane hindernis den altaristen desselbin vorgenanten altaris zu Hermansdorff fulgen sullen und alle jar jerlichen gefallen noch lewte und usweisunge der kumglichen brife die vormols dorobir gebin sein und geschriben czuhand und doselbist gabin wir Heinrich von Lazan als ein houptman von kumglicher macht von Behemen unsern willen und gunst czu der stifftunge desselbin altaris und ouch zu den czinsen das dy demselbin altir adir seinen altaristen elbiglichen fulgen sullen und gefallen, dach mit sulcher undirscheid das die erben adir die bisiczere de gutis zu Hermansdorff den vorgeschriben czinss gancz und gar mitsampt der einen mark czins vier grosschin und die czwey herheller wert birs alle sontage czins mogen abekouffen und losen ane hindernis wenn sie das vormogen als hoch als sie vorschriben sten unschedlich vorsessein czinse noch wochenczal noch der kunglichen brife lawte die dorobir gebin sein und geschriben, diselbe vorczeihunge bekentnis vorrichtunge und alles das vorgeschriben stet habin wir stete und gancz und bestetigen sie von kunglicher gewalt von Behemen der wir gebruchen mit dem kunglichen ingesigel der lantlewte des furstenthums zu Breslaw das do ist zu erben und zu sachen das an disen kegenwirtigen briff ist gehangen. Gebin zu Breslaw am montage noch sand Elysabethtag noch Cristi geburt vierczenhundert jar und dornoch in dem newczenden jare, dobey sein gewest die edeln Hano Luckow, Friderich Runge, Stephan Kumersa von der Nympkyn, Nitsche Ome, Petir Rote, Michel Banke, Peter Roster und Franczek Dompnik der jungiste unstirs hern des kunigs von Behemen man und Niclas Bunczlaw canczler des vorbenumpten furstenthums zu Breslaw der disen kegenwortugen brif hat gehabt inbenelhunge.