Porta Apostolorum. – Johannes Cralouicz et Johannes de Duba vicarii etc. Nouerit vestra vniuersitas, quod nuper vacante abbacia monasterii Porte Apostolorum, archiepiscopo Pragensi iure ordinario subiecti per mortem fris Johannis Polomecz, vlt. et inmediati rectoris eiusdem in exilio defuncti, ipsiusque corpore ecclesiastice tradito sepulture, frater Jacobus, dicti mon. prior ord. S. Benedicti in exilio degens, religiosis fratribus dicti mon. professis hincinde in exilio degentibus, quos habere potuit, dictam mortem nuncciauit ipsosque hortatus est, ut ad aliquem locum tutum et precipue ad monasterium sue habitacionis in Camenicz Missnensis dioc. ad tractandum de eleccione futuri abbatis conuenirent, et signanter fratres infrascriptos Augustinum prepositum, Martinum, rectorem molendinorum, Georgium, prepositum in Slawyetin, Albertum de Slawyetin et Bohuslaum de Zdiar, dicti monasterii professos. Qui fratres dicta morte percepta et nuncciacione dicti fris Jacobi prioris suscepta simul ad tractandum de eleccione futuri abbatis conuenientes tractatibus debitis prehabitis vnanimiter consenserunt et potestatem tradiderunt prenominato fri Jacobo priori abbatem dicto monasterio nominandi ipsumque d. archiepiscopo Prag. aut ipsius dd. vicariis pro approbacione presentandi et prefatum frem Bohuslaum cum huiusmodi mandato ad dictum frem Jacobum priorem transmiserunt. Quo facto pretactus fr. Jacobus prior huiusmodi mandato habito et viso consiliis maturis premissis prenominatum frem Bohuslaum de Zdiar presentem et audientem suo et dictorum fratrum ac tocius conuentus monasterii memorati nomine in dicto monasterio in Camenicz in prenominati monasterii in Porta Apostolorum elegit abbatem ac huiusmodi eleccionem sic factam ibidem publicauit ac ipsum frem Bohuslaum requisiuit, ut huiusmodi eleccioni consentiret. Ad quod ipse fr. Bohuslaus infra tempus, diuine nolens resistere voluntati, sponte et libere consensit et litteris a dicto fre Jacobo priore de huiusmodi eleccione receptis nobis humiliter supplicauit, quatinus dictam eleccionem approbare ipsique electo munus confirmacionis ad dictam abbaciam impendere dignaremur. Nos vero visis litteris super premissis omnibus, cridam seu proclamacionem in loco nostre habitacionis, cum ad dictum monasterium hac vice non pateat securus accessus ex causis diuersis, de dicta eleccione publice festiuo die populi multitudine astante fieri procurauimus diem certam omnibus, qui se dicte eleccioni opponere vellent, pro termino peremptorio statuentes. In quo termino prenominatus fr. Bohuslaus crida cum debita execucione producta omnium aliorum, quorum interest, non comparencium contumacia accusata eleccionem de ipso factam approbare postulauit. Ad cuius peticionem omnibus, quorum interesse poterit, non comparentibus contumacibus reputatis a dicto fre Bohuslao iuramentis debitis receptis eleccionem prescriptam approbamus ipsumque frem Bohuslaum eiusdem abbacie preficimus abbatem, pastorem et rectorem etc. Dat. et actum Zitauie a. D. MCCCCXXIX, indicc. VII, die XII mensis Jan. hora terciarum in curia dotis ecclesie Zitauiensis in estuario hiemali, pontificatus d. Martini pape V anno XII, presentibus Philippo de Mikulowicz, Paulo de Holubicz, notariis publicis, et d. Gyra, plebano eccl. in Czrnucz, et multis aliis.

Et ego Wenceslaus, quondam Wenceslai de Praga, publicus notarius, omnibus supradictis presens interfui etc.