In nomine Domini amen. Ego Johannes dictus Gessin, civis de Minori civitate Pragensi, tenore presencium publice recognosco universis, quod sanus mente et corpore, non conpulsus nec coactus, set sponte et libere, matura prehabita deliberacione, temporis instabilitate ac periculositate pensata, nesciens, quid michi futura pariat dies, testamentum meum ultimum de omnibus bonis meis mobilibus et inmobilibus, michi a dei clemencia largiflua misericorditer collatis et concessis, ne super hiis inter posteros et amicos meos, me defuncto, aliqua litis valeat oriri materia, condo, lego, facio, ordino et dispono per omnia in hunc modum. Primo enim constituo huiusmodi testamenti mei tutores, ordinatores et dispositores providos ac discretos viros Wenceslaum wostnik et Kotlonem doleatorem, cives Maioris civitatis Pragensis, ac Wenceslaum, alie partis Pragensis notarium, amicos et fautores meos singulares, de ipsis specialiter presumendo, quod huiusmodi meum testamentum fideliter exequantur, prout de eis confidenciam indubie gero specialem. Deinde volo et intencionis mee existit firmum propositum, ut omnia et singula debita, per me debitoribus meis contracta ac debitorie obligata et iuris civilis ordine demonstrata, de bonis meis ante omnia effectualiter persolvantur. Residuum autem omnium bonorum meorum mobilium et inmobilium, ultra solucionem huiusmodi resultancium, videlicet duas curias, unam in Gessin et alteram in Buczyna, quas habere dinoscor, cum agris, cultis et incultis, pascuis, ortis, humuletis, pomeriis et piscinis nec non cum omnibus et singulis censibus in certis hominibus predictarum villarum consistentibus, redditibus, fructibus, proventibus et utilitatibus universis ac cum omnibus et singulis iuribus et proprietatibus et ipsarum pertinenciis, in quibuscumque rebus existant, vel qualibet libertate ad ipsas pertinente, Katherine consorti mee dilecte dono, lego, testor et assigno ad habendum, tenendum, utifruendum ac per eandem pacifice possideudum et quiete, omni impedimento amicorum meorum et hominum quorumlibet, spiritualium aut secularium, penitus ultroiecto. Horum in evidenciam sigillum meum proprium, in testimonium vero sigilla prudencium virorum Pechonis dicti Walcharz et Dobessii Ssleyferz, consulum iuratorum predicte Maioris civitatis Pragensis, ad preces meas presentibus sunt appensa. Actum et datum domini MCCCC vicesimo primo, feria quarta in capite ieiunii.