Wir Albrecht, von Gotes gnaden herczog ze Oͣsterreich, ze Steir, ze Keͣrnden und ze Krain, markgraf ze Meͣrhern und graf zu Tirol etc., bekennen für uns, unser erben und nachkomen, markgraven ze Meͣrhern, und tůn kunt offenntleich mit dem brief, daz wir haben angesehen die getrewn vleissigen dienst, so uns unser getrewr lieber Czenk von Mossnaw uncz her hat getan und hinfür tün sol und mag, und haben im dadurch und für all vordrung, so er von diensts, darlegen, zerung und scheͣden wegen, auch von Teÿncz wegen, oder wie die vordrung genant weͣr, uncz auf disen heutigen tag zu uns hat oder gehaben möcht, unsere geslozzeͣr Buchelaw und Göding ingegeben und sechs tausent schokh Behemischer gross darauf verschriben haben und verschreiben auch wissentleich in kraft des briefs in solher mass, daz er und sein sun, die er ÿecz hat oder hinfür gewinnet, dieselben unser geslozzeͣr mit meutten, welden, ekhern, wisen, wassern, vischwaiden, teyhen, reͣnnten, nuczen, zinsen, dorffeͣrn, leuten, güteͣrn und allen andern ïrn zůgehorungen mitsambt den nuczen, zinsen, dorffeͣrn, leuten und gütern und allen andern zůgehörungen, die zu dem geprochenn haws Teÿncz habent gehört, für die egenanten sechs tausent schokh in saczs und phands weis innhaben und auf ir selbs zerung, darlegen, kost und scheͣden verwesen, bewaren, behutten und fürsehen und auch mit beschaidem notdůrfftigem gepaw versorgen sullen getrewleich, als wir in des getrawn, alslang uncz daz wir, unser erben oder nachkömen, markgrafen ze Meͣrhern, dieselben unsere geslozzeͣr umb die vorgenanten sechs tausent schokh gross von in ledigen und lösen. Derselben losung si uns, unsern erben und nachkomen, markgraven ze Meͣrhern allczeit stat tůn und gehorsam sein sullen, wenn wir der mit den egenanten sechs tausent schokhen an si begern. Weͣr aber, daz der egenant Czenk und sein sun mit dem tod abgiengen, ee wenn die vorgenanten geslosser von in gelöset wůrden, so sullen uns, unsern erben und nachkomen, markgrafen ze Meͣrhern dieselben geslosseͣr mit allen ïrn zůgehörungen dann nach ïr aller abgang und des lesten leibs under in an alle losung wider ledig sein und an uns gevallen an irer erben und meͣnikleichs irrung und hindernuss ungeveͣrleich. Ausgenomen siben hundert schokh gross, die mag der egenante Czenk seim weib oder in ander weg darauf verschaffen oder geben nach seinem tod darauf ze haben, wie im das fůgsam ist, doch solhen personen, die uns auch gehorsam und wider uns nicht sein an alles geverd, den wir dann dieselben sibenhundert schokh sullen beczalln und ausrichten auch ungeverleich. Auch sullen die vorgenanten Czenk und sein sun den phlegern und burkgrafen ze Buchlaw und Goding, welch die ÿe werdent ze zeiten sein, in ïr aÿd und gelubde pinden, daz si der gegenwůrttigen unsrer verschreibung geͣnczleich nachkomen und dawider nicht tůn in dhainerlay weis, und si darczu halten, daz si uns, unsern erben und nachkomen, markgraven ze Meͣrhern also geloben und sich nicht lassen entseczen. Uns haben dann die burkgrafen, die dieselben vest und phleg nach in werdent innhaben, vor auch also gelobt an geveͣrd. Wir haben auch dem egenanten Czenken zu sein ains lebtteͣgen gegeben und übergeschaft newnczig markh Behemischer gross jerleicher zins von den gwöndleichen losungen, so uns die erbern weisen unser lieben getrewn, unser burger ze Brunn, alle jar phlichtig sind ze raihen, also daz si im oder seim anwalt die nu hinfur, dieweil er in leben ist, jeͣrleich zu zwain teͣgen im jar, das ist zu sant Jorgen tag fumfundvierczig markh und zu sant Michels tag fumfundvierczig markh ze Brunn fürderlich beczalln und ausrichten, damit er die egenanten geslosser desterpas verwesen und bewaren mug. Wan was si im derselben summ alle jar gebent und ausrichtent, der sagen wir si ledig und wellen in die albeg an irer raittung legen und abcziehen. Und wenn der vorgenante Czenkh mit dem tod abgangen und verschaiden ist, so sind uns, unsern erben und nachkomen, markgraven ze Merhern, die egenanten newnczig mark zins wider ledig und sullen dann in unser kamer ze Merhern geraihet werden an des egenanten Czenken erben und meͣnicleichs irrung und hindernuss ungeveͣrlich. Auch sullen der egenante Czenk und sein sun die egenanten herschefft mitsambt den leuten und gütern, so darczů gehörnt, unwüstleich innhaben und dieselben leut uber die gwondleichen zins und zůstennd nicht besweͣrn ungeverlich. Sie sulln auch die meutt, die gen Buchlaw und Göding gehörnt, an den rechten mauttsteten nemen, als recht und von alter herkommen ist, und die leut an denselben meutten nicht höher dringen noch besweͣrn, denn si pilleich und von recht phlichtig sind, damit si nicht ubergriffen werden an alles gevërd. Auch sulln si uns, unsern erben und nachkomen, markgrafen ze Meͣrhern mit den vorgenanten unsern vesten Buchlaw und Göding wider meͣnicleich nyemant ausgenomen gehorsam und geweͣrttig sein und uns die offen halten zu allen unsern notdürften, uns und die unsern, die wir darczů schaffen, darin und daraus ze lassen, wenn und wie offt uns des not geschiecht und wir des an si begern, doch an ïr merkleich scheͣden. Mit ůrkunt des briefs, versigelt mit unserm grossen furstleichen anhangen insigel, das wir im land ze Meͣrhern geprauhen. Der geben ist ze Wienn an montag vor sant Gilgen tag nach Kristi gepůrde vierzehen hundert jar, darnach in dem sibenunddreissigisten jare.

D(ominus) dux in cons(ilio).