Johannes, miseracione diuina tituli sancti Ciriaci sancte Romane ecclesie presbyter cardinalis, Pragensis et Olomucensis ecclesiarum comendatarius, uniuersis et singulis Christi fidelibus presencium noticiam habituris, salutem in omnium saluatore. Sancta mater ecclesia filios suos licet disparsos ad sui gremium diuersis variisque graciarum et indulgenciarum promissionibus allicere non desistit, spem vite eterne in gaudio polliciendo. Cum itaque, quemadmodum rei euidencia luce clara demonstrat, loca pia fere singula in regno Boemie ex antique preuaricacionis hostis venefica suggestione per ministros nequicie sint dirupta, deuastata et quam multipliciter occupata timorque tirannidis ipsius fidelibus ad superremanentes ecclesias securum prohibet accessum, propter quod Christi fideles nimium angustiis afficiuntur, cum ipsis pia loca, que deuocionem promouent, abstrahuntur, unde consolacione et corroboracione gracie indigent specialis, ut armis constancie et scuto fidei suffulti liberiori spiritu fructum deuocionis coaugerent in vitam eternam. Sane percepimus, qualiter in ciuitate Noueplzne, nostre Pragensis diocesis, quam plurima multitudo fidelium exulum locum sue mansionis elegerit securum, ut ab inquinamento inimicorum Christi se castos et tutos custodirent. Volentes igitur eosdem, utpote constancie titulis clarescentes, dono et gracia consolacionis spiritualis confirmari et corroborari, omnibus et singulis personis utriusque sexus, spiritualibus et secularibus, inter septa dicte ciuitatis degentes sic et aliis Christi fidelibus illac confluentibus vere contritis et confessis, qui zelo deuocionis accensi ecclesiam parrochialem sancti Bartholomei apostoli ibidem in Plzna in festiuitatibus, Christi natiuitatis, circumcisionis, epiphanie, resurreccionis, ascensionis, spiritus sancti, corporis Christi, et in solennitatibus gloriose semperque virginis matris Marie, anuncciacionis, visitacionis, assumpcionis, natiuitatis, concepcionis, purificacionis, diebus sabbati officiis eiusdem deputatis, necnon in festis sanctorum Petri et Pauli, Bartholomei et in dedicacione ecclesie ac singulis diebus per quadragesimam deuote visitauerint, flexisque genibus ante sacrarium corporis Christi seu altare maius aut aliud quodque in eadem ecclesia, dominicam oracionem et angelicam salutacionem deuote dixerint, aut in circumeundo eandem ecclesiam pro animarum, quorum corpora ibidem requiescunt, orauerint salute, necnon, ut dicte ecclesie opus inceptum ad laudem dei valeat consumari, seu pro luminibus et ornamentis aliis eiusdem ecclesie de bonis a deo sibi collatis manus porexerint adiutrices, quocienscunque et quandocunque premissa seu aliquod premissorum facerint, de omnipotentis dei misericordia et beatorum Petri et Pauli apostolorum eius auctoritate confisi centum dies indulgenciarum in remissionem peccaminum presentibus concedimus et elargimur. In cuius rei testimonium sigillum nostrum maius, quo in ecclesia Olomucensi vsi sumus et vtimur, presentibus est appensum. Datum Posonii, Strigoniensis diocesis, anno domini millesimo quadringentesimo tricesimo, die tercia mensis januarii.