Mein willigen dinst czuvor. Liben hern! Ich thu euch czu wissen, daz mir als heunt umb ersten slaf ist redlich botschaft komen, daz dy keczer von der Mysse und anderz wo sich stark samen und meinen, dez edeln, meines genedigen herrn arm lewt czum Heyligen Crewcz und czum Newndorf ader anderzwo er dy hat in czu vorterben. Also hab ich gen Tochaw und dem foyt czu Beczaw geschriben heunt umb mitnacht, daz dy auch dor auf horchen und sich samen, alz sy starkest konnen, wo ez not thut, daz sy czuczügen. Also hab ich meins gnedigen hern lewt und sust wen ich vormag vorbot czu mir gen das Altenwasser czu komen und ir fusvolk auf czwen tag zu speissen. Pit ich euch liben herrn von meinz genedigen hern wegen, daz ir wolt mein genedigen hern leyhen lewt czu fuz und gerytten, alz ir meist kont, nemlich in Dreincze und in Alberewte, spete, daz dy noch heunt czu mit gen dem Altenwasser komen, ez wer bey tag ader nacht. Daz wil ich euch vor mein genedigen hern danken, daz sein gand ein solchz mit den sein umb euch sol vordinen. Geben an dem nesten sunttag morgens vor sant Martinstag in dem xxvi jar. Niklaz Fraz, foyt czu Kunigzwart.