Ich Caspar Czennër von Frueling bekenn, als ich in des hochgeborn fursten herczog Albrechts, herczogen ze Osterreich etc., meins genedigen herren, dinst under dem edelen herren herrn Mathesen von Ror, die zeit haubtmann zu der Igla, an dem sold gelegen bin und daselbs etbevil sche^aden emphangen hab, daz mir der obgenante mein genediger herr von derselben sche^aden wegen, die ich unczen auf heutigen tag genommen hab, wie die genant sein, ein gancz benugen getan und mir darumb erberleich ausgericht und beczalt hat ain summ gelts, daran mich wol benuget hat, darumb gelob ich, daz ich von der obgenanten scheden wegen hincz dem obgeschriben meinem gene^adigen herren, herczog Albrechten, seinen lannden und lewten furbas dhain zuspruch noch vordrung haben sol noch wil in dhainerlay weys an gevërd. Mit urkund des briefs besigilt mit der erbern Lienharts des Newnhofer und Vlreichs des Soll, burger ze Wienn, insigl, die ich des fleyssikleich gebeten hab, daz sy die zu gezeugnuss der sachen auf den brief gedrukcht haben, in und irn erben an schaden, darunder ich mich verpind, alles das stet ze halden, daz oben an dem brief geschriben stet. Der geben ist ze Wienn an eritag vor sand Pangre^aczen tag anno Domini etc. vicesimo tercio.

Dem hat man ausgericht X tal. den.