Heinricus, dei gratia dux Slesie et dominus Glogaviae maioris, reverendissimis in Christo patribus et dominis miseratione divina cardinalibus, patriarchis, archiepiscopis, episcopis, ceterisque prelatis in concilio Basiliensi in spiritu sancte congregatis, dominis meis gratissimis cum reverendia et cetera. Post debitam obedientiam paratam in omnibus serviendi voluntatem! Reverendissimi patres et domini gratiosissimi! Est quoddam opidum sub vocabulo Gorlitz nuncupatum circa confinia regni Behemie situm. Cuius inhabitatores tot et tanta diutinis temporibus a Thaboritis et Hussitis dampna et tribulationes sustulerunt et perpessi sunt, quod multorum circumiacentium civitatum et opidorum animus movetur, quod talia tam diu sufferre et sumptibus sufficete potuerunt, cum semper tam strenue et viriliter ipsorum incursibus se opposuerunt, quod usque nunc numquam cum ipsis aliqua treugarum et pacis federa habere voluerunt. Dignentur igitur reverendissimae paternitates vestrae, dicti opidi inhabitatores meis intervenientibus precibus in proponendis et agendis coram paternitatibus vestris benigne habere recommissis. Reverendissimarum paternitatum vestrarum gressus dirigat deus in viam salutis et cetera. Scriptum Glogavie 20. die mensis Martii.