Vnsern willigen dinst zuuor. Ersamen weisen lieben herre. Wir lassen euch wissen, daz markraff von Branburk ach on freitag obent wider kumen ist gen Tochaw vnd ist geschiden von markraff von Maygssen, won er wider hinter sich gerukt waz wber walt vnd herczog Růmpolt auss der Slesia auch wider wentig waz worden, dan daz markraff von Meygssen so wil mit ym getaydgint hat vnd herczug Rumpolt geschriben hat, daz er wider in daz felt ruke, derauff markraff von Maygssen wartent ist, vnd auf ein sulchs haben die czwey pischoff der antwort her dishalb waldes nicht harren wollen vnd sind alz hewt vor tag wber walt gerukt, vnd alz wir daz verstunden, do ret wir mit meins herre gnaden vnd paten sein gnaden vns darinnen furczusehen vnd wie wir vns danne halten schulten. Darauff vns sein gnaden antwort, wir schulten zu sein gnaden rukken zu der stat vnd der antwort do erharren von markraff von Meyssen vnd won herczug Rumpolt aus der Slesia. Vnd lieben herre, so wollen wir noch paz mit vnser herre gnaden reden, ab vns sein gnaden erlauben wolt heymzuruken vnd wellen spest tun in allen sachen getrewlich. Got sey mit euch. Geben on suntag wor Symonis et Jude anno XXII°.