Testamentum Duhkonis de Praga

Testamentales sui sunt Marcus carnifex et Vlricus Wildensin, protunc iurati consules, qui sic deposuerunt, quod prefatus Duchko dum in lecto egritudinis decumbens debilis corpore, sanus tamen mente et compos racionem coram eis legavit et disposuit omnia bona sua mobilia et inmobilia ubilibet habita seu comparata iuxta libitum sue voluntatis: Primo legavit Petrussye conthorali sue legitime mediam partem omnium bonorum suorum et alteram partem pueris suis tali condicione, si unus puerorum ante annos discrecionis decederet, tunc bona seu porcio illius pueri super alium puerum iure hereditarie debet devolui. Si autem ambo pueri ante annos discrecionis decederent, tunc omnia bona ipsorum super predictam Petrussie matrem ipsorum debent devolui hereditarie iure sine quorumlibet hominum impedicione. In casu autem, si predictam Petrussie matrem ipsorum puerorum ab hac luce migrare contigeret predictis pueris vivis remanentibus, extunc omnia bona sua super prefatos pueros suos devolui debent hereditario iure sine quorumlibet hominum impedicione et contradictione. Et si prefata domina Petrusie bona sua rehabebit, extunc ipsa Margarethe, sorori Duchkonis predicti, de prefatis bonis XX sexagenas grossorum dare debet et assignare. Actum anno Domini M^o CCCC^o vicesimo sexto, feria 4^a post festum sancti Michaelis archangeli.