Durchluchtiger und großmechtiger fürste besunder lieber herre und lieber frewnt. Unsern guten willen in allen sachen. Als ir von dem allerdurchlüchtigestem fürsten unserm herren dem Rômischen konge zu einem gemeinen hauptman gen Böhem zu zihen geben und auch gesatzt sit, und als wir vernomen haben euch nû zu dem zuge Karlstein zu reten geschickt und besamet habt, und wann auch nü der fride zwischen euch und ewren buntgenossen uf einem tailb und herrzog Ludwig uf dem andern fur sich geet als danne beret ist worden, und das wir hoffen das ir nicht trefflicher hindernûß habt die euche an dem zuge gehindern mochten: und darumb so ervordern ermanen und biten wir euch in ganzem getrawen so wir ernstlich konnen und mogen, das ir, dem almechtigen got zu lobe und zu eren und dem cristenlichen gelauben zu sterkung, volriten und nit hinder sich zihen wollet, ab sach wer das di nit alle chomen die dann chomen sullen, sunder die weil mit dem ganzen volkch in den steten ligen und teglichen krieg treiben wollet bis das das andern volk auch komen wurdet, das doch als wir vernomen haben zu euch auf sand Gallen tag komen wurdet. Danne wo ir und die andern zu disen zeiten wider zuruck und nit für euch zuget, so wurd der Karlstein und villeicht das ganz konkreich zu Behem verloren, und wurde dann die schuld alle uf euch als wir forchten ligen, das uns zumal nit lieb wer. Darumb so last euch in den sachen ernst sein und behalt das volk ie bei einander. Das wir sünderlich wo wir mügen umb euch verdienen wellen. Und getrawen ouch zu dem almechtigen got, sin genaden schol also mit euch sein das es euch in allen ewren sachen. Geben zu Regenspurg am samztag vor sand Francissen tag. Branda cardinal von Placzencz genant des bebstlichen stuls legat et cetera.