Julianus, miseratione divina etc. sancte Sabine sancte Romane ecclesie presbyter cardinalis volgariter sancti Angeli nuncupatus, in Germania apostolice sedis legatus, dilectis nobis in Christo proconsulibus et consulibus opidi Egrensis, Ratisponensis diocesis, salutem in Domino. Devotionis vestre sinceritas et merita integritatis fidei, quibus erga Romanam ecclesiam clarere dinoscimini, nos inducunt, ut votis vestris in hiis presertim, per que divinis reddamini intenti obsequiis, favorabiliter annuamus. Hinc est, quod nos devotis vestris in hac parte supplicationibus inclinati, ut singuli ex vobis, qui de laudabilibus virtutum operibus, quibus suscitatis dudum in regno Bohemie turbationibus constanter restitistis, plurimum commendamini, nec non singule coniuges vestre, quotiens aliquem vel aliquam ex vobis et illis aliqua infirmitate gravari contigerit, ex qua ecclesias vestras accedere non possitis sive possint, liceat vobis et coniugibus ipsis habere altare portatile cum debitis reverentia et honore, super quo in locis ad hoc congruentibus et honestis sine alieni iuris preiuditio in familiarium vestrorum domesticorum presentia per proprium vel alium sacerdotem ydoneum missas et alia divina officia celebrari facere possitis et possint, vobis et eisdem coniugibus vestris legationis, qua fungimur, auctoritate tenore presentium indulgemus. Datum Basilee die quintadecima novembris, anno a nativitate Domini millesimo quadringentesimo tricesimo sexto, pontificatus sanctissimi in Christo patris et domini nostri, domini Eugenii, divina providentia pape quarti, anno sexto.