Nos Andreas iudex, Johanko et Sigismundus aurifaber, consules iurati et ciues ciuitatis in Noua Plzna, tenore presencium recognoscimus uniuersis testificando, quod prouidus vir Johannes, filius Nicolai Hinkonis, in lecto egritudinis decumbens, licet debilis in corpore, sanus tamen mente et bona perfruens racione, nobis in testimonium vocatis et rogatis, presens testamentum, quod voluit esse ultimum ipso defuncto, fecit in hunc modum: Primo namque medium laneum cum fundo agrorum penes crucem cum prato et fundo, quod pratum iacet in Dudlewecz, et triginta sexagenas grossorum, sicud pie memorie Nicolaus Hynkonis sibi Johanni in porcione sua delegauit, prout in testamento ipsius Nicolai Hinkonis plenius exprimitur, ipse Johannes supradictus Katherine, uxori sue dilecte, et puero, quem ipsa Katherina, uxor sua, in suo utero portat, delegauit et donauit et per presencia delegat et donat equali porcione inter se diuidenda, sit masculus uel femina. Si vero ille puer, quem ipsa Katherina in suo utero banilat, ad lucem non pervenerit, quod absit, uel ad lucem iam perveniens non habens annos mature etatis ab hac luce per mortem tolleretur, tunc pars ipsius pueri in Katherinam, uxorem suam, pleno iure debet devolui, cum quibus bonis post mortem ipsius pueri ipsa Katherina, uxor supradicti Johannis, debet facere, quidquid sue placuerit voluntati, tamquam cum propriis et non alienis; de quibus tamen triginta sexagenis, cum primum extorquerint, ipse Johannes delegauit fratribus Nigri monasterii in nostra ciuitate, decem sexagenas grossorum ad comparandum unam sexagenam grossorum census annui et perpetui, ad peragendum quolibet anno quatuor anniuersaria in uigiliis et missa defunctorum, prout moris est, cunctis temporibus pro anima ipsius Johannis et pro animabus predecessorum suorum sine omni negligencia. Item domum illam, quam dominus Sigismundus, Mielnicensis prepositus, sibi cum Hinaczkone, fratre suo, in Praga delegauit et donauit, partem suam illius domus ipse Johannes testator Hinaczconi, fratri suo, potenter delegauit et donauit, cum eadem domo faciendi, quidquid sue placuerit voluntati, absque quorumlibet hominum omni impedimento. In cuius rei testimonium sigilla nostra propria ad preces ipsius Johannis presentibus sunt appensa. Datum anno domini millesimo quadringentesimo tricesimo tercio, ipso die beatorum Felicis et Adaucti martirum.