Unsern freuntlichen dinst zcuvor. Lieben freunde! Als ir uns geschriben habt von der ketczere wegin, das habin wir wol vernomen und thun euch zcu wissen, das uns unsere gnedigen herren von Sachsen auch von ketzere wegin geschriben haben, wie das in eygentliche warnunge komen ist, das sy genczlich in ire lande meynen und die zcu vorterben. Dorumb ich, Nickel, mich auf disen nehsten freytag mit dem rysigen geczewge eyns teils erheben und zcu iren gnaden reyten und hinder mit umb gancze folge, ab der not sein wirt, das die geschiet, bestellen muß. Daromb, so biten wir euch freuntlich von unser gnedigen herren wegen, ewer kuntschaft zcu den ketczern zcu bestellen und so ir eigentlichst möget zcu erfarn, auf welchen ort sie sich gneczlich meynen zcu keren, und wenn ir das also erfaret, das ir uns das eigentlich pey tag und nacht ane sewmen gein Voitsperg wollet schreiben. Daran tut ir unsern gnedigen herren sunderlich zcu dancke und wolgefallen und wollen es gerne vordinen. Gegeben am dinstage an sende Nicolaßtage anno et cetera xxix°. Nickel und Hanns von Wolfestoff, voite zcu Voitsperg und Schöneck.