Mein freuntlichen dinst czuuor. Ersamen, weissen, lieben hern vnd freund. Es ist Sigmund Thosse als nechten von Pemen komen vnd hat mir eczwas sach gesagt, das ich euch schold schreiben. Nu ist mir suliche sach nicht alle fugsam czu schreiben, vnd kan sein auch als noch notorft nicht geschreiben vnd hab in dorvmb czu euch gesant euch in geheim czu vnterrichten, das ir euch in ewer nothorft darnoch richt vnd der heiligen kristenheit bestes dorin derekent vnd furnemt et cetera. Auch lieben hern, als ir wol wist das meins herrn genad iczunt nicht in dem land ist vnd sich dy sach widerwertikeit gross macht, so hab ich ezwey sloss czu besorgen, ab mir ichtes pruch word vnd euch dorumb anlanget pit ich euch von meins gnedigen hern vnd der heiligen cristenheit wegen vnd willen, ir wolt mein hern mit andern frum lewten, dy ich von meins hern wegen pey mir hab euch gutlich dorin derweissen vnd hulflich sein, das wil ich euch vor meins hern genad dancken vnd das freuntlich vmb euch vordinen. Geben am Sent Nickuloes tag anno oc. XXVIIII°.