Unsern frundlichen grus czuvor: Erbare, weize lieben heren und frunde, als ir uns geschreben habt in allen sachen, die ir uns bevolen habt, unsern ernsten fleis czuthunde et cetera, das habe wir nicht gesewmet, und haben das mit groser mühe und mit ernstem fleisse an unseren heren kunig mundlich und auch brieflich bracht und iczliche sache eigentlich erzalt, die sachen unser here allis nach bei im behalden hat und hat uns bescheiden ken Granaw mit unserm heren dem bisschofe und hat gesprochen zu uns: „wir haben euch allczit ein redlich gut ende gegeben, das ir frölich von uns gescheiden seit, als wollen wir auch nach tuen,“ auch wisset, das her alle ritterschaft und botschaften, die von allen landen iezund zu im komen, bescheiden hat ken Presburg, und besorgen, das wir nicht ee ein ende gehaben mögen, her kome denn ken Presburg. Ouch wisset, das wir nicht konnen gewissen, wer nach unser houbtman sein wirdt, wenn wir idoch von wores merken am bisschofe von Passaw und auch an anderen heren, das der bisschof houbtman bleiben werde .... Geben zu Granaw am dinstage nach Jacobi. Michel Banke und Michel Glezil.